Wie is ons?
Familiekerk NG Kameeldrif is geleë in die hartjie van die Kameeldrif-area. Ons roeping en identiteit is gewortel in die woorde van Matteus 28:19–20, waar Jesus ons stuur om sy dissipels te wees en ander te maak. Uit hierdie roeping leef ons ons waardes van Sagte Harte, Lewende Water en Helder Ligte.
Ons is ’n geloofsfamilie waar Christus sentraal staan, die Bybel ons riglyn is, en die Heilige Gees ons lei. Hier vind mense ruimte om God te aanbid, saam te groei in geloof, en mekaar in liefde te dra. Ons streef daarna om ’n oop en gasvrye huis van die Here te wees, waar almal welkom is en waar verhoudings gebou en versorg word.
As deel van die breër liggaam van Christus, glo ons dat ons geroep is om te dien in ons gemeenskap, om getuies van hoop en lig te wees, en om saam as familie God se koninkryk sigbaar te maak.
Die week se lewemde water
Week 30
Moeder Teresa staan bekend daarvoor dat sy behoeftige mense gehelp het. Sy het armes, siekes, sterwendes en haweloses se lewens aangeraak — mense wat deur die wêreld misgekyk was. Sy het nie net oor liefde gepraat nie; sy het liefde prakties gewys. Sy het egter nooit die eer vir haarself geneem nie. Sy het op ’n keer gesê: “Ek is net ’n klein potloodjie in God se hand. Hy skryf ... ek is net beskikbaar.” Wat ’n pragtige beeld. ’n Potlood hoef nie groot of indrukwekkend te wees nie. Dit moet net in die regte hand wees. Dit is dikwels hoe God werk. Hy soek nie eerstens mense wat alles perfek kan doen nie; Hy soek mense wat bereid is om beskikbaar te wees. Wanneer ek en jy opdaag, onsself beskikbaar stel en vir God vra om ons te gebruik, kan Hy deur ons gewone lewens buitengewone dinge doen. Liefde Liesel xx
